股價（P）由純利（E）及純利增長率（G）決定，但「E」及「G」卻唔容易掌握。
過去一年，小麥由 3 美元一蒲式耳升至今年一度見 17 美元，一年內升幅五倍，真係難以想像！主因係殊仔既愚蠢乙醇計劃刺激玉米需求，加上去年全球天氣轉壞，令到全球糧食價格急升。
回望過去四十年，香港樓價由 1967 年 50 元一呎升至 1997 年 8 月 12000 元一呎，上升二百四十倍；金價由 1969 年初 35 美元升至 1980 年 1 月 850 美元，上升二十三倍；利率由 1980 年中既 21 厘減至 2003 年既 1 厘，下跌 95％；油價由 1973 年 10 月既 1.5 美元一桶到 2008 年 3 月 103.5 美元一桶，上升二十八倍。恒生指數由 1967 年中 67 點到 2007 年 10 月 32000 點，上升四百七十六倍。只要捕捉到任何一個大浪，都可令人發達。
我老曹擒日搭的士，的士司機與我老曹同歲，佢大吐苦水曰，當年的士牌 18 萬元，佢冇膽供；住宅樓幾萬元一層時冇買，亦好後悔，到今天只能依靠月入萬零蚊，好彩身體仍佳頂得住。我老曹睇睇佢，再諗諗自己，到底係我老曹較別人幸運，抑或我老曹較別人聰明？ 1967 年踏足社會做事至今超過四十年，工資收入有幾多？再計計 1969 年我老曹住 5000 元到銀行開支票戶口，學人地投資股票兼買樓，哪方面收入較多？答案係 5000 元資本既投資回報（本利和），係自己四十年打工收入既四倍！應驗七十年代一位世伯果句──「發達容易、搵食艱難」及「冇人打工發達」。由此顯示，智慧理財十分重要。
彼得林治認為，響投資市場，十次中睇岩六次已經了不起，冇人十次岩十次。投資要成功係點樣響十次睇中既六次中賺得大，睇錯四次中輸得少。就係唔好感情用事，其次係止蝕唔止賺，每次虧損10-15％時不要氣餒，傷心一天，第二天重返戰場。長痛不如短痛，投資就係學習接受短痛，唔好讓小虧損變成大虧損。
索羅斯認為，呢次衰退係過去六十年內最差既一次，富國銀行主席認為，繼大蕭條後從未見過一次全國性房價咁樣跌法。係波動既股市中，風險往往超過回報。
滬深A股應響不久將來發出熊市確認訊號（50天線跌穿250天線）。我老曹認為，係環球化既大環境下，只有時差（前後之分），冇兩不相干（decouple）既可能性。新興市場不但升幅大，未來跌幅亦大，例如越南股市已由高位回落超過50％，以O計仍乏吸引力。中國 GDP完成五年高增長後，總有三幾年低增長期，2008年可以例外嗎？去年中國人均收入達2500美元一年，相等於1951年美國、1970年日本，仍處於高儲蓄率、高投資期及私人消費上升期，呢段日子漸由出口帶動轉為內部消費帶動（一如八十年代至1997年香港）。去年12月中國零售業上升20％，係近十年內最好，響轉型期通常出現短暫衰退期，例如1973至74年日本及1981至82年香港。所謂青黃不接期，即製造業出口業增長率放緩，但零售業及內需又未能完全取代。
過去六星期可用「狂牛」去形容商品價格，無論能源、貴重金屬、農產品價格，去年8月至今升幅都十分大；到底係需求推動抑或資金離開股市轉攻商品市場既結果【圖】？
美國經濟進入放緩期，商品價格反而急升？有人認為係中國同印度因素。但點解價格響去年8月前唔升，響去年8月次按危機爆發後才升？上述項目已形成拋物線（parabola）趨勢。通常只有響牛市三期，才會出現拋物線上升曲線，過去六個月商品價格上升，有可能係商品牛市第三期。大家都知道，拋物線上升，到左極限時又可以出現拋物線回落，最近例子係本港國企指數，由去年8、9、10月上升，到11、12月及今年1月回落。
商品幾時見頂？甚至最專業既投資者亦無法事前告訴你，但拋物線上升遲早見頂可以肯定。我老曹忠告係──遠離商品市場，沽售所有同能源、原材料有關股份。
引導群眾、追隨群眾、遠離群眾，乃成功投資策略三部曲。群眾係轉角市出現前通常犯錯。
沒有留言:
發佈留言