成為「策略投資者」

1997年起我老曹已放棄價值投資法（Value Investing），理由係咁多大行研究，自己仲有乜真知灼見？因此唔再相信Buy and hold策略。其後漸漸相信動力投資法（Momentum Investing），背後理念係相對強勢（Relative Strength）便擇肥而食。當金價跑贏股市、當資源股跑贏大市時，只買強勢項目（外國叫牛眼投資法）。2006年6月起內地A股轉弱為強，便投資紅籌、國企；2007年10月內地A股轉強為弱，便放棄紅籌、國企。賺快錢唔賺慢錢，賺大錢唔賺小錢（Fast and big, not slow and small），賺錢速度太慢及太小，寧可唔賺。賺快錢及賺大錢既力量來自知識與分析，when to buy, what to buy, How much to risk, when to sell.（何時買入、買什麼、風險多大、何時沽出。）如今我老曹已成為「策略投資者」。

兩大想法

自古至今有兩大想法：

一、左傾者認為透過政府向富人抽稅、補貼窮人，去減少貧富懸殊（所謂不患寡而患不均）；
二、右傾者認為透過減稅、鼓勵投資，讓富人創造更多財富，財富多左，人人分享到個份財富都增大左，雖然貧富差距大左，但窮人生活仍較以前好過。

過去前者叫社會主義，後者叫資本主義，到今天已很難真正劃分。前者著重公平分配，後者著重創造財富。

問反彈同當頭起有咩分別？

今年有唔少人估信貸壓碎（credit crunch）嘅結束點，甚至反彈點，而佢地忘記咗淡市莫估底既教訓，因此愈買愈低、愈低愈買，結果損失慘重。有讀者打電話黎問反彈同當頭起有咩分別？一、當頭起升幅最少20%；二、一浪高於一浪（即喺次低點才入市）；三、50天移動平均線重返250天線之上；四、當頭起係熊三出現後先出現（熊三P/E 係八至十二倍之間）。

利用上述幾點分析依家既形勢仍係熊二（因恒指P/E喺十二倍之上），理論上只有反彈而冇上升。客觀形勢係美國房地產狀況係度轉壞緊。去年係防危機年，今年係小心謹慎年。

今年5月開始既熊市二期，家吓仲睇唔到盡頭，剔除港股直通車影響，我地只係返番去消息公布前嘅20000點水平；今年8月前景展望肯定較去年8月差，驚恒指20000點遲早失守。

我老曹唔信美國樓價復甦前美股可出現牛市，港股有40%受美股影響，即係呢方面唔使諗，另外40%係受中國因素影響，中國GDP正進入增長放緩期；剩番20%先係本地因素。

如9月恒指再唔大升，恐怕第四季恒指20000點將失守。