陸羽仁談 short put

你問我 shortput(沽出認沽期權)的問題，唔知你係唔係玩慣，唔玩慣要小心。沽出價外的認沽期權表面看風險細，但潛藏突然爆發的風險，如你沽6月2823的認沽期權，行使價10.5元，佢一個月低位12.66元，一年低位11.4元，10.5元的行使價，正常計風險唔大，但爆發性風險係突然來一個股災(特別係環球性股災)，例如杜指一晚跌20%，咁沽出的認沽期權就有被行使的風險，到市況大波動時期權變價內，引伸波幅又高，想平倉都唔易，呢o的事情可能兩三年發生一次，發生的時候要承受到至好做。

你問長期沽空內銀認購期權有無問題，沽貼價的和遠價外的期權效果好唔同，如沽遠價外的，風險如上。如沽近價的，就表示你短期睇好內銀，覺得佢跌得差不多無得跌，要記住期權月月結算，你可能啱，但下個月先至啱，佢跌完再跌，就有風險。你問我沽乜o野行使價好，我覺得唔係問呢種問題，你好似問緊我對內銀的睇法，我覺得你要做較高風險的衍生工具，先要有一種方法，係一種控制風險之道，先決定係沽貼價還是遠價期權(兩種控制風險或做對沖的方法很不一樣，因為沽一份貼價期權的收的期權金，可能等如五份、十份遠價期權的期權金)，而唔係問吓諗吓內銀的走勢。